Pinapalaro ka ba sa labas nung bata ka?
Naikwento ng aking kapatid kung gaano kaganda ang kutis ng kanyang kaibigan dahil naalagaan ito noong bata pa. Hindi pinapalabas ng bahay at kung palaruin man, ay balot na balot.
Pinapalaro ka ba sa labas noong bata ka?
Ako, oo. At masaya ako dahil dun.
Naniniwla ako na ang bawat bata ay may karapatan na maglaro. Na maranasan tumakbo, umakyat, mapagod, matuwa, makipag-away, umiyak.
Hindi ba mainam turuan ang bata ng pagpapahalaga, pakikipaglaban para sa alam na tama, at kahulugan ng buhay sa pamamagitan ng paglalaro? Dahil dito nila nararanasan ang matalo, manalo, makipag-talo, mag-ehersisiyo, makipag-pakilala, magbahagi, mabahagian.
Hindi ba masaya alalahanin na ang peklat sa kaliwang kamay ay alaala ng pagtatanggol sa nasirang laruan? At ang hiwa sa kanang kamay ay simbolo ng pagharap sa takot umakyat sa puno? Balewala ang sugat na matatamo. Gagaling din naman ang sugat ng kahapon. Maglalaho din ang bukas ng masamang alaala.
Ngunit nakakalungkot, na nag bata ngayon, ang pag-asa at tagasalba ng ating bayan, ay nakakalat sa kalsada...gutom, nagtitinda...at ang mas malala pa, nalulunon sa droga. At kung hindi man, nagnanakaw.
Nakakalungkot isipin na patuloy ang paglaki ng harang sa pagitan ng mayayamang bata sa mahihirap.
Maganda nga ba ang naghihintay na kinabukasan sa mga batabg sinasanay sa wikang Ingles, tinuturuan tumugtog, sumayaw, gumaling sa ano mang larangan, gayong ang ating bayan, ang ating ekonomiya, at ang milyong-milyong Pilipino na nagsilbing pundasyon ng ating bayan, ay patuloy na lumulubog, lumalayo...nagkakawatak-watak...
At pag nagkataong lumala pa it, maalala pa kaya nila ang simpleng patakaran sa laro ng buhay? Maibahagi kaya nila ang bakanteng duyan sa ibang batang naglalaro?
Nakakalungkot isipin na sa mga susunod na taon, tuluyan ng lulubog ang kulturang ipinamana sa ating bayan at ang kalayaang ipinagtanggol ng ating mga bayani para sa lahing Pilipino.
Unti-unting na nga ba maglalaho ang mga palaruan ng batang Pilipino na nagsilbing alaala sa minsang matiwasay na buhay - buhay na kayang harapin kasama ang mga kalaro, sama-sama.
Ikaw, nakapaglaro ka na ba?
